Bea Gómez repetiu o resultado do sábado colgándose dúas novas medallas na xornada definitiva do Campionato de España de Inverno celebrado este fin de semana en Castellón.
A nadadora do Galaico logrou unha prata e un bronce para facer un total de cinco metais nas tres xornadas de competición.
En horario matinal a pontevedresa nadou os 100 libres, unha proba dominada por Melanie Costa (53.88), seguida de Fátima Gallardo (54.95) e a propia Bea, que pechou o podio cunha marca de 55.28.
Xa pola tarde foi a quenda dos 200 estilos, onde a deportista do Galaico só foi superada, e por escasa marxe, por Mireia Belmonte (2.09.09) finalizando en segundo lugar e batendo o récord galego da distancia en piscina de 25 metros (2.10.93).
En total tres platas e dous bronces de balance para Bea Gómez a escasas dúas semanas de afrontar o Campionato de Europa de Inverno de Herning, en Dinamarca.
Pola súa banda Iria García, que competía nos 800 metros libres, finalizou no vixésimo sétimo lugar cun tempo de 9.04.99.