"Sair do monte e dos rocódromos" para que "a xente coñeza a escalada".
É o obxectivo principal da primeira edición de Ponte a Escalar, competición de escalada urbana pioneira en toda Galicia e que aterra en Pontevedra o vindeiro sábado 24 de maio.
A cita, organizada polo Club AROMON con motivo do seu 25 aniversario, celebrarase "sobre todo na zona vella. En Curros Enríquez, Mugartegui, A Ferrería...", explicou na súa presentación oficial Anxela Pedrouso desde o AROMON.
"Arrancaremos ás 10.30 da mañá con 50 escaladoras e escaladores que se dividirán en 20 bloques, zonas de pasos", engadiu sobre o desenvolvemento do campionato.
Os escaladores deberán encaramerse a edificios e estruturas emblemáticas da Boa Vila subindo sen corda uns poucos metros co único seguro dun colchón e un ou dous 'carrexadores' que amortigüen unha posible caída.
Unha proba que "xa é un éxito", resaltou a concelleira de Deportes, Anabel Gulías, avanzando que se cubriron as 50 prazas dispoñibles.
"O centro histórico que temos, a cidade en xeral, é un escenario de luxo para facer escalada urbana", defendeu a edil.
Participará "xente de todos os clubs de Galicia", sinalaron.
Todo iso con deportistas de categoría cadete-xuvenil e sénior.
