O Club Cisne Balonmano anunciou a ampliación do contrato de Dani Virulegio para a próxima tempada.
O pivote de 22 anos, natural de Redondela, continuará defendendo a camiseta do conxunto pontevedrés en División de Honra Prata baixo a dirección técnica de Marcos Otero 'Quiños'.
Virulegio, nacido o 24 de febreiro de 2003, destaca pola súa envergadura (197 cm) e por combinar "fortaleza, carácter e calidade a partes iguais" na súa posición de pivote, segundo destaca o club no seu comunicado en redes sociais.
O xogador iniciou a súa carreira deportiva na SAR de Redondela antes de incorporarse ao Cisne en 2018, cando militaba en categoría cadete.
Tras o seu paso polas categorías inferiores do club, debutou co primeiro equipo na tempada 2019/20 durante un partido de Copa do Rei fronte á SD Teucro.
Na tempada 2020/21, aínda en idade xuvenil, deu o salto á Liga Asobal, debutando nada menos que contra o FC Barcelona. Esa tempada chegou a disputar un total de oito encontros na máxima categoría do balonmán español.
A súa traxectoria continuou no Atlético Valladolid (2022/23) e posteriormente no BM Vila de Aranda (2023/24), onde xogou en calidade de cedido. Na campaña 2024/25 regresou ao Cisne Balonmán baixo as ordes de 'Quiños', quen seguirá dirixíndoo a próxima tempada.
A nivel internacional, Virulegio conta con experiencia nas categorías inferiores da selección española. Debutou co combinado xuvenil en febreiro de 2020, participando no Campionato do Mediterráneo disputado en Grecia, onde España se proclamou campioa.