Daniela Suárez, a nadadora pontevedresa que brilla en Europa: "Non o esperabamos"

A tripla campioa de Europa junior de natación artística, Daniela Suárez, foi recibida este mércores cunha calorosa benvida polos seus compañeiros do Club Natación Galaico nas instalacións da Fundación Rías do Sur en Pontevedra.

A deportista, visiblemente emocionada e sorprendida polo recibimento, compartiu as súas sensacións con PontevedraViva tras o éxito cultivado no Europeo celebrado en Atenas.

"Estamos moi contentas, porque non o esperabamos. Concentrámonos un mes no CAR (Centro de Alto Rendemento de Sant Cugat del Vallès) e pois nada, moi contentas, moi contentas", declarou Suárez, quen se converteu na primeira nadadora artística galega en obter medallas en competicións internacionais.

"Concentrámonos moi pouco ao ser o europeo", recoñece a nadadora, feliz polas medallas conseguidas, en relación á preparación do campionato.

A pontevedresa, que estuda primeiro de bacharelato no Centro Galego de Tecnificación Deportiva (CGTD) de Pontevedra, logrou un histórico triplete en terras helenas ao colgarse o ouro nas modalidades de Equipo Libre, Equipo Técnico e Rutina Libre Acrobática xunto ás súas compañeiras da selección española.

Na final de rutina libre por equipos, o conxunto español realizou unha impecable execución inspirada na película "Aladdin", que lle outorgou 286,1464 puntos, superando amplamente a Italia (259,9138) e Grecia (257,5313).

O equipo español, integrado por Suárez xunto a Naia Álvarez, Ariadna Benito, Isabel Shuang Cui, Lily Gualtieri, Carla Lorenzo, Paula Marcipar e Daniela Velázquez, dominou todos os parámetros da competición.

Malia que Italia partía cunha nota de dificultade catro puntos maior, España impúxose con contundencia en todos os aspectos técnicos: 153,5964 puntos en elementos fronte aos 134,2638 de Italia, e 132,5500 en impresión técnica ante os 125,6500 das italianas.

Estes resultados contribuíron a que España finalizase segunda no medalleiro do Europeo junior, só por detrás de Rusia, cun balance de catro ouros, catro pratas e un bronce.

Tras este éxito internacional, Suárez xa mira cara ao seu próximo reto: o Campionato de España Alevín e Júnior, que se celebrará do 10 ao 13 de xullo en Las Palmas de Gran Canaria.

"Temos o Campionato de España e acabamos a tempada. Terminamos a próxima semana", comentou a nadadora, entre felicitacións.