O deporte pontevedrés, protagonista nunha mañá de recepcións no Concello

O deporte pontevedrés citouse ao longo da mañá deste martes co alcalde da localidade, Miguel Anxo Fernández Lores; e coa concelleira de Deportes, Anabel Gulías, nunha xornada de recepcións con motivo dos diferentes éxitos alcanzados ao longo da tempada.

Entidades de todos os ámbitos e disciplinas acudiron ao despacho de alcaldía para compartir as súas experiencias e os seus logros do pasado curso.

A rolda de recepcións abriuna o Club Treboada, que hai un mes completou unha destacada actuación nos campionatos nacionais e que celebrou o IV Open Cidade do Lérez o pasado mes de xuño.

Seguiulle un Club Galaico que pode presumir dunha tempada repleta de éxitos e de organizar a Copa do Mundo de Natación Artística celebrada o pasado mes de maio no Complexo Deportivo Rías do Sur.

Tamén houbo espazo para o atletismo, pois os dous clubs da cidade como son a Sociedad Gimnástica e o Atletismo Rías Baixas gozaron de sendas recepcións municipais.

Ademais, a Gimnástica acaba de completar unha destacada actuación no Campionato de Europa Sub18 que se saldou cun cuarto posto de Guille Piñeiro.

Non foi menos o Club Bádminton Pontevedra, que completou unha histórica campaña na máxima categoría nacional e chegou a disputar as semifinais polo título de liga.

Por último está o Club de Loita Pontevedra, que leva o nome da cidade a cada recuncho do mundo ao que vai e que completou un ano repleto de éxitos internacionais a través de figuras como Lydia Pérez e Nadia Zholtikova.