Derrota do CW Pontevedra ante o CN Barcelona nun partido con aroma a play-off

Derrota do Club Waterpolo Pontevedra fronte ao CN Barcelona no CD Rías do Sur. O conxunto pontevedrés non puido co club decano nun partido sen nada en xogo a nivel clasificatorio, pois ambos terminarán en segunda e terceira posición respectivamente pase o que pase na última xornada.

Con todo, este partido serviu como toma de contacto para dous equipos que se verán as caras na semifinal do play-off de ascenso.

Tres tantos en cinco minutos foron a carta de presentación do histórico club catalán, que xa dominaba o encontro nun primeiro cuarto sen máis goles que os anotados por Clara, Mireia e Julia para as visitantes.

Mireia ampliou esa vantaxe no inicio do segundo tempo e puxo un 0-4 no marcador que debuxaba un escenario ben complexo para o equipo pontevedrés. Apareceu entón Carmen para facer o primeiro gol lerezano apenas 20 segundos despois.

Julia devolveu a vantaxe de catro tantos ás catalás e Andrea replicou un minuto despois para pór o encontro 2-5.

Os cinco minutos previos ao descanso consistiron nun intercambio de golpes que se saldou cun parcial de 2-2 para deixar ao CW Pontevedra tres goles abaixo (4-7)

As defensas cobraron protagonismo no terceiro tempo, pois un solitario gol de Andrea aos dous minutos tras a reanudación foi o único destacable. Resultado de 5-7 para o equipo de Arthur Neves, que aínda cría nunha posible remontada.

Non foi así, pois o último cuarto estivo de novo dominado polo CN Barcelona. Mireia, que terminou o encontro con seis goles, continuou a súa exhibición ofensiva con catro tantos nos últimos oito minutos.

Entre medias tentouno o conxunto pontevedrés, que non puido achegarse no marcador e terminou caendo por 8-12.

Este resultado deixa ao Club Waterpolo Pontevedra terceiro pase o que pase na última xornada. As lerezanas mediranse ao CN Rubí o vindeiro sábado coa vista posta no play-off de ascenso.

Consulta as estatísticas neste enlace.