O encontro deste sábado entre o CN Vallirana e o CW Pontevedra tivo que ser suspendido xusto antes do último cuarto por mor dun problema co cloro da auga da piscina do club catalán.
No momento da suspensión, o resultado era favorable para o equipo pontevedrés (8-11).
Ningún dos dous equipos ten nada en xogo, polo que aínda se descoñece se o conxunto lerezano terá que volver a Barcelona nos próximos días para disputar os minutos restantes ou se, polo contrario, darase por válido o resultado que había cando se detivo o partido.
Tal e como explican desde o propio Club Waterpolo Pontevedra, a cantidade de cloro que había no ambiente causou problemas de saúde ás xogadoras de ambos os equipos, que experimentaron síntomas respiratorios como tose abundante desde o primeiro cuarto.
Con este panorama, ambos os clubs acordaron de mutuo acordo suspender o encontro ante o risco que isto estaba a supor para ambos os planteis.
Até o momento da suspensión, o encontro desenvolveuse cun CW Pontevedra que mandou no marcador desde os primeiros minutos.
O arranque do conxunto lerezano foi frenético, pois os goles de Isabel, Carmen Rodríguez e Andrea Prados puxeron ao CW Pontevedra por diante (0-3) cando só transcorreran tres minutos de partido.
Aínda que Ainhoa freou a hemorraxia co primeiro tanto local, Andrea volveu anotar para as pontevedresas no minuto 6. A renda de tres goles reduciuse no tramo final, pois Lucía e Anna recortaron distancias para o CN Vallirana e o primeiro tempo concluíu con 3-4 no marcador.
Mantivo a dinámica goleadora o equipo de Arthur Neves no segundo cuarto, que arrancou co gol de Isabel no primeiro minuto. O cadro catalán errou un penalti apenas uns segundos despois e Carmen anotou de novo para aumentar a vantaxe lerezana (3-6).
A renda mantívose até o descanso, pois ambos os equipos entraron nun intercambio de goles que se saldou con dous tantos para cada bando no tramo final do segundo tempo. O encontro chegou ao ecuador, por tanto, cun resultado de 5-8.
Xa nos minutos previos á suspensión mantívose o guión do encontro con tres tantos máis para cada contenda, que deixaron un resultado provisional de 8-11 para as lerezanas.
A efectos clasificatorios nada cambia, pois o equipo de Arthur Neves xa está matematicamente clasificado para disputar o play-off de ascenso.