O Club Baloncesto Arxil perdeu a súa praza na liga Feminina 2 durante este Xoves Santo.
O descenso de categoría certificouse sen que o equipo pontevedrés tivese que saltar á pista, debido ao resultado do partido aprazado entre o Siroko Xixón e o Barakaldo.
A vitoria das asturianas por 50-75 en terras vascas elimina calquera posibilidade de permanencia para o bloque verde.
Con este marcador, o Xixón alcanza os dez triunfos, unha cifra inalcanzable para o Arxil, que actualmente suma sete vitorias a falta de só dous partidos para concluír o campionato.
O equipo lerezano ocupará unha das tres prazas de descenso xunto aos Carballos Lleida e ao TGN Bàsquet. Esta perda de categoría leva, ademais, o descenso automático do seu filial, o Arxil Mafari, á liga autonómica.
O curso deportivo do Arxil estivo marcado por unha profunda renovación do persoal tras o paso do club pola liga Challenge na campaña anterior.
Un inicio de liga con resultados negativos situaron ao club na zona baixa da táboa desde as primeiras xornadas. Malia a melloría mostrada no tramo final da competición, onde encadearon dous triunfos consecutivos, os resultados dos seus rivais directos terminaron por sentenciar o equipo.
Este descenso supón o regreso do Arxil ao cuarto nivel do baloncesto español, unha categoría na que non militaba desde o ano 2001.
Agás que se produzan vacantes administrativas nos despachos durante o verán, o club de Pontevedra deberá reestruturar o seu proxecto deportivo en Primeira Nacional para a próxima tempada 2026-2027.