O Campionato de Europa de Piragüismo Sprint de Moscova (Rusia) viviu este domingo o seu último día de competición coa disputa de varias finais, nas que había representación pontevedresa.
Con todo os padexeiros da comarca non puideron loitar polas medallas e finalizaron lonxe do podio.
Foi o caso de Adrián Sieiro e Sergio Vallejo (Piragüismo Poio) no C-2 200 metros, no que foron sétimos.
Tampouco puido pelexar polos postos de honra Diego Romero (Breogán do Grove) no C-1 5.000 metros, entrando en meta nunha meritoria novena praza.
Con todo Galicia si logrou unha medalla na xornada final, a dos tudenses Rubén Millán e Gabriel Campo no K-2 500 metros, onde foron segundos a só 272 milésimas da embarcación eslovaca.