Fin de semana de grandes éxitos para os atletas da Sociedade Gimnástica Pontevedra no Campionato de España Sub18 celebrado en Castellón.
O gran protagonista foi, sen dúbida, Guille Piñeiro. O vallista logrou o seu posto na final tras superar as eliminatorias e terminou a súa actuación con todo o alto ao lograr a medalla de prata da súa modalidade.
Para logralo, Piñeiro bateu o récord galego coa súa mellor marca persoal (13.41), unha mínima que lle outorga o pase directo ao Europeo que se disputará en Italia a próxima fin de semana do 18 e 19 de xullo.
As alegrías non terminaron aí xa que o seu compañeiro de club, Alejandro Santos, tamén se fixo cunha medalla de prata no campionato nacional, esta vez no 3000 metros lisos.
En canto ao resto da expedición lerezana, Miguel Ángel López logrou un destacable oitavo posto en lanzamento de disco ademais da súa nova mellor marca persoal (44.90). Finalizou na mesma posición na modalidade de lanzamento de peso.
Menos sorte tiveron os vallistas Jovi Uyokpeyi e Carlota Vázquez, que do mesmo xeito que Carmen Paz en 400 metros lisos non puideron clasificarse para as súas respectivas finais.
Outra das grandes noticias para a Gimnástica nesta fin de semana chegou desde o Gran Premio Cidade de Vigo da man de Cris Garrido, que bateu o récord do club en 100 metros lisos.
A pontevedresa asinou a nova marca a bater cun tempo de 11.90 que lle permitiu levar a proba celebrada na cidade olívica.