O mellor baloncesto masculino de Europa volverá reunirse en Pontevedra. Será os próximos 11 e 12 de setembro coa undécima edición de EncestaRías, unha cita que se gañou por méritos propios un lugar relevante dentro do calendario deportivo.
O torneo manterá o seu habitual formato cuadrangular, que permitirá aos afeccionados gozar de catro partidos durante dúas intensas xornadas de competición.
A organización continúa perfilando un cartel especialmente atractivo, no que estará representada a elite do baloncesto galego, con presenza de equipos da Liga ACB, xunto a algunhas das grandes referencias do panorama europeo.
EncestaRías permite achegar aos afeccionados unha competición e uns xogadores que habitualmente non poden contemplarse en directo no territorio provincial, xa que Pontevedra non conta con representación estable na elite do baloncesto masculino.
A gran novidade desta undécima edición será o nacemento de EncestaRising, un torneo paralelo de categorías de formación dedicado ao minibasket. A competición celebrarase tamén os días 11 e 12 de setembro no pavillón da Xunqueira de Pontevedra.
EncestaRising contará cunha participación limitada a 16 equipos de minibasket: oito masculinos e oito femininos.
Os clubs interesados en formar parte desta primeira edición ou en recibir máis información poden dirixirse á organización a través do correo electrónico [email protected].
A posta en marcha de EncestaRising permitirá xerar un espazo único e exclusivo de convivencia entre o deporte de base e a elite profesional.
Así, durante unha mesma fin de semana e nunha mesma cidade, a ilusión dos xogadores máis novos compartirá protagonismo coa excelencia dalgúns dos clubs e deportistas máis destacados do baloncesto galego, nacional e europeo.
Con este novo torneo, despois de dez edicións, EncestaRías amplía o seu alcance e dá un novo paso na evolución dun evento que logrou construír un nome propio dentro do baloncesto autonómico, nacional e internacional.
Esta aposta polo crecemento terá tamén a súa vertente feminina.
A organización traballa na celebración en Vilagarcía da segunda edición do EncestaRías Women, unha iniciativa que pretende reforzar, visibilizar e pór en valor o baloncesto feminino de elite.
A súa celebración en Vilagarcía, tamén en setembro, contribuirá a recoñecer ese traballo, ampliar a súa proxección e ofrecer aos afeccionados unha nova cita de máxima relevancia.
Engade Pontevedra Viva como fonte preferida de Google de balde
Mantente informado coas últimas noticias de actualidade.