A Sociedade Deportiva Teucro regresa este domingo ao Pavillón Municipal (11:00 horas) para enfrontarse ao Balonmán Lalín, nun encontro que vai moito máis alá do estritamente deportivo.
Neste sentido, no marco do proxecto 'Volver', o club activará a iniciativa 'Sempre fieis, sempre azuis' en colaboración coa protectora Os Palleiros.
O obxectivo, sinalan, é dar visibilidade á realidade dos animais abandonados e implicar á sociedade a través dun xesto colectivo de solidariedade.
Baixo o nome de 'Operación Despensa', o equipo pontevedrés pon en marcha esta iniciativa coa que todos os afeccionados poderán acceder de forma gratuíta ao partido a cambio dunha doazón de pensos, latas, mantas, correas ou arneses.
O TEUCRO, A SACAR A súa MELLOR VERSIÓN
Os azuis afrontan o encontro como unha nova oportunidade "para seguir construíndo equipo e reforzar unha identidade que o seu técnico, Sergio Carballeira, busca asentar como base do próximo proxecto".
O Teucro chega á cita na sétima posición, con 28 puntos nas 27 xornadas disputadas. Diante terán a un Lalín que está décimo terceiro con 18 puntos e que acumula catro partidos consecutivos perdendo.