Sexto triunfo da tempada en liga para o Club Cisne, que non tivo que empregarse a fondo ante o actual pechacancelas da competición, o Tolosa, para levar os dous puntos en xogo no Centro Galego de Tecnificación Deportiva de Pontevedra (40-35).
Os de Jabato non empezaron ben en defensa, pero deron un auténtico recital ofensivo desde o inicio de partido, como demostran os 22 goles a favor cos que chegaron ao descanso e os 40 ao final do choque.
Con esa facilidade para anotar, era cuestión de tempo que o Tolosa non puidese seguir o ritmo, e iso sucedeu mediado o primeiro acto, coa entrada en xogo da segunda unidade de ambos os equipos, cando o Cisne mellorou lixeiramente en defensa e como seguía anotando abriu oco de seis goles (22-15) que obrigou a pedir tempo morto ao técnico visitante.
Probara Álex Nogues, adestrador do Tolosa, cun cambio de defensa do 6-0 inicial a un 5-1 con presión sobre Chapela, que estaba a dirixir a orquestra local, pero nin con esas deu coa tecla para parar os recursos ofensivos cineístas.
Cunha renda tan ampla ao descanso (22-15), o Cisne saíu á cancha na segunda metade coa intención de administrar o marcador e asegurar o triunfo. Fíxoo sen demasiados apuros, a pesar de que o equipo vasco reduciu distancias a falta de pouco máis de 10 minutos (33-29). Recuperáronse desa baixada de rendemento os locais e nin unha dobre exclusión puxo en perigo a merecida vitoria, que fai ao Cisne seguir crecendo e mirar cara aos postos altos da clasificación.