Fin de semana perfecta para o TM Monte Porreiro con dobre vitoria ante L'Hospitalet e Arteal Santiago

O Tenis de Mesa Monte Porreiro completou un fin de semana redondo ao sumar dúas importantes vitorias en menos de 48 horas, que lle permiten escalar até a terceira posición da Superdivisión, con 12 puntos, a só un do Olot e catro do líder Priego TM.

O conxunto pontevedrés abriu a dobre xornada o venres a domicilio ante o CTT L'Hospitalet, nun encontro comezou costa arriba para o Monte Porreiro tras a derrota por 3-0 de Martín Bentancor ante Rajul Desai.

A reacción non se fixo esperar e André Coelho e Miguel Ángel Vílchez deron a volta ao marcador coas súas dúas vitorias fronte a Konstantin Chernov (1-3) e Norber Tauler (2-3), pondo en vantaxe aos visitantes.

Xa no cuarto partido, Bentancor resarciuse da súa mal estrea e impúxose a Chernov (1-3) para situar o 1-3 no marcador global. Desai recortou distancias tras gañar a Vílchez por 3-1 (2-3), pero no duelo decisivo Coelho certificou o triunfo cun sólido 1-3 ante Tauler que confirmou o 4-2 a favor dos pontevedreses.

Sen apenas descanso, o equipo regresou á Boa Vila para medirse o domingo ao Arteal Santiago, nun derbi galego con idéntico resultado final.

De novo o encontro empezou mal, con derrota de Vílchez ante Jorge Campos (1-3), pero Nico Galvano devolveu a igualdade cun contundente 3-0 fronte a Abiodun-Ganiu.

Bentancor adiantou ao conxunto local tras superar por 3-1 a Humberto Manhani, pero o Arteal replicou con outra vitoria de Campos ante Galvano (3-1), colocando o empate a dous.

No quinto duelo, Vílchez sufriu até o último xogo para superar a Manhani (3-2), antes de que Bentancor, novamente decisivo, asinase a sentenza cun 3-0 sobre Abiodun-Ganiu que puxo o 4-2 final.