A Copa de España de Ciclocrós viviu a fin de semana unha dobre proba, a terceira e cuarta puntuable do campionato, no País Vasco.
Unha dobre cita na que volveu a ser protagonista o Grupo Deportivo Supermercados Froiz.
O seu corredor Gonzalo Inguanzo reforza o seu liderado elite. Foi segundo o sábado en Amurrio, superado por Kevin Suárez, pero repúxose o domingo para conseguir un gran triunfo sobre o barro do Ciclocrós Internacional de Karrantza.
Entrou na meta cunha vantaxe de 21 segundos sobre Mario Junquera, de 29 segundos sobre o galo Gilles Cyprien e de 34 sobre o seu compañeiro de equipo Raúl Mira, mellor sub23 e que tamén comanda a clasificación desta categoría.
Ademais Miguel Rodríguez asinou senllos sextos postos.
No País Vasco estreaba ademais a tempada de ciclocrós a marinense Lorena Patiño, tras o seu gran rendemento coa bicicleta de montaña (XCO).
A dobre campioa de España júnior foi a mellor sub-23 en Amurrio e en Karrantza.
Na primeira proba finalizou quinta a nivel absoluto a 1:20 da gañadora Lucía González e na segunda foi cuarta a 1:22 de Sofía Rodríguez.
Preto de entrar entre o dez primeiras quedou pola súa banda o sábado María Filgueiras (XSM), undécima e sendo a sexta mellor sub23.