'Orgullo en Xogo'. Así se bautizou o partido de fútbol co que se pretende loitar desde Ribadumia contra a homofobia no deporte.
Trátase dun encontro que se disputará o próximo 12 de agosto no Campo Municipal A Senra 2.
Un evento que ten o obxectivo de promover a diversidade e a inclusión desde o terreo de xogo.
O encontro enfrontará ao Xuventude de Sisán e o Jugentud Cambados, incluíndo a lectura dun manifesto pola diversidade e a igualdade.
Organizado polo Xuventude Sisán con apoio do propio Juventud Cambados, a Asociación Gotas e o hotel Quinta de San Amaro, os seus responsables afirman que buscan chamar a atención ao mundo do deporte sobre a necesidade de crear espazos seguros e respectuosos para todas as identidades e orientacións, nun contexto no que a homofobia segue presente nos estadios de fútbol.
"Non hai constancia de ningún outro evento semellante en Galicia, e moi poucos en todo o Estado", aseguran.
'Orgullo en Xogo' terá presenza nas redes sociais animando á cidadanía a compartir a xornada con hashtags como #OrgulloEnXogo, #FútbolConOrgullo e #DeporteInclusivo.
O partido dará comezo ás 20.45 horas.
