A Gladiator Kids pon a proba aos máis pequenos de Pontevedra

Pontevedra vibrou este sábado co desafío da Gladiator Race, unha das probas estrela no calendario deportivo da cidade que celebrou este domingo a súa versión adaptada para os máis pequenos.

Trátase da Gladiator Kids, unha proba deseñada para poder ser completada por nenos e nenas de todas as idades pero coa mesma esencia de esixencia e superación que a versión adulta da mesma.

E co afán de superar cada proba e obstáculo que se presentase, máis de 400 pequenos gladiadores citáronse na contorna da Illa das Esculturas na mañá deste domingo.

Desde as 10:00 puideron recoller os seus dorsais e ás 11:00 arrincou a competición con saídas graduadas en pequenos grupos, mesmo modus operandi que na Gladiator Race.

Tiveron que correr, saltar, rubir ou reptar por diversos obstáculos para superar os percorridos de 500 e 800 metros adaptados ás idades dos participantes.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Gladiator Race Oficial (@gladiator_race)

Do mesmo xeito que na xornada do sábado, o agradable clima permitiu gozar ao completo dunha experiencia que se afianza cada vez máis na cidade do Lérez.

Tanto é así que esta undécima edición da proba organizada por NOKAO bateu todas as marcas de inscricións ao completar as prazas no mes de marzo e deixar a máis de 500 persoas en lista de espera.

Lonxe do afán competitivo, a mellor das noticas nesta xornada dominical é que as familias da Boa Vila puideron gozar dunha xornada repleta de deporte e diversión nunha contorna idónea para iso.