Pontevedra gozou a fin de semana dunha competición poucas veces organizada en Galicia e que regresaba ao calendario tras estrearse antes da pandemia, a Costa Atlántica MTB Tour.
A proba ciclista de montaña por etapas concluíu este domingo na Praza da Ferrería despois de tres bonitas xornadas deportivas, empezando pola contrarreloxo nocturna a modo de prólogo celebrada na noite do venres polo centro da cidade.
Despois chegarías dúas xornadas de puro BTT maratón, primeiro o sábado con 80 quilómetros de percorrido e despois o domingo con 68 quilómetros máis, saíndo e chegando ao centro da cidade.
Ao redor de 200 ciclistas, entre as categorías competitivas e a 'open', participaron na proba organizada por Global DxT.
Unha carreira que na categoría elite adxudicouse o pontevedrés Guillermo García Janeiro. O ciclista profesional do Radio Popular Paredes Boavista portugués, especialista na estrada, pasou á bicicleta de montaña con éxito superando en 2 minutos e 23 segundos a José Antonio Trujillo, sendo terceiro Rubén Quintáns.
Destacou ademais a participación dun campión e un subcampión mundial da especialidade, o portugués David Vaz e o español Juan Pedro Trujillo, que comandaron por esta orde a categoría Master 40.
O resto de vencedores foron: Daniel Herráez e Pablo Liñarez (CDM Xesteiras) na categoría de parellas elite, Gonzalo Vidal e Jose Canosa (CDM Xesteiras) en parellas máster, María Isabel Felipe (Conway CDC Trujillo) en máster feminina, Bruce Teixeira (Casa do Povo de Abrunheira) en máster 30 e Aquilino Casalderrey (Ribadumia CC) en máster 50.