A portaría da Sociedad Deportiva Teucro xa ten un inquilino para a próxima tempada. Trátase de Iago Gómez, gardameta procedente do Calvo Xiria de Carballo e que foi presentado este xoves de xeito oficial no Pavillón Municipal dos Deportes.
Iago asina por unha tempada co club azul e aínda que sabe que aínda está por chegar outro porteiro, tras a saída de Juan Bar e a rescisión de Cadilla, asegura chegar a Pontevedra "para pelexar por ter minutos".
Iago Gómez: "Levaba un par de anos querendo xogar nesta categoría"
Despois de seis tempadas na Primeira Nacional Iago Gómez asegurou que "levaba un par de anos querendo xogar nesta categoría".
O gardameta cre ademais que "hai equipo para estar arriba" e cualificou como moi importante na súa decisión de fichar polo Teucro a presenza de dous paisanos seus, Carlos García e David García Pichel: "somos os tres de Carballo, somos amigos e claro que axudou".
Aínda que faltan por chegar polo menos outro porteiro e un pivote e a intención de Quique Domínguez é pechar o plantel canto antes, o presidente azul, Carlos García-Alén, asegurou que non se esperan movementos ao respecto nos próximos días.