Non hai dous sen tres. Ou iso, polo menos, consideran no Pontevedra CF que despois de semanas de 'apagamento informativo' -e en plena onda de calor-, anunciaron este sábado até tres fichaxes.
E é que pouco despois de confirmar as incorporacións de Jerin Ramos e Adri Argos, o club avanzou que Ilias Charid tamén se suma á disciplina granate.
O extremo, de 24 anos, chega procedente do Xerez Deportivo.
Formado na canteira de Osasuna, desenvolveu unha progresiva traxectoria até converterse nun futbolista importante no conxunto andaluz.
Con eles xogou as dúas últimas campañas en Segunda RFEF. Na máis recente disputou un total de 33 partidos, 31 deles como titular, e anotou cinco goles.
Desde o Pontevedra subliñan que se trata dun xogador que pode actuar en ambas as dúas bandas e tamén por detrás do dianteiro.
Destacan del a súa mobilidade, a súa creatividade e o seu un contra un.
Nos últimos anos, engaden desde a dirección do conxunto granate, consolidouse como un atacante capaz de marcar diferenzas grazas á súa velocidade, desborde e capacidade para xerar ocasións de gol.