A flamante campioa da Copa de España de Cilocrós Júnior, Irene Trabazo, deu un salto gran salto na súa aprendizaxe participando, por primeira vez, na Copa do Mundo da especialidade.
A marinense desprazouse estes días a Bélxica para tomar parte das citas de Namur e Heuden-Zolder, nas que competiu coas ciclistas de categoría Elite.
Trabazo non puido rematar en Namur o pasado día 21, abandonando a competición na segunda das cinco voltas programadas, pero si o fixo este venres en Zolder, rematando no posto 49.
A deportista do Club Ciclista Marín chegou cunha volta perdida sobre a vencedora, a holandesa Marianne Vos, que completou os 15,85 quilómetros previstos nun tempo de 0:43:24.
A mellor española en ambas as dúas citas foi Aida Nuño, chegando no posto 24 en Namur e no 21 en Zolder.
Irene Trabazo céntrase agora no Campionato de Galicia, que se disputa este domingo 28 en Maceda, e principalmente nun dos seus maiores obxectivos da tempada de inverno, o Campionato de España que se correrá entre os días 9 e 11 de xaneiro en Xixón.