Primeira vitoria nunha proba absoluta de categoría internacional para a marinense Irene Trabazo, vencedora na Copa de España de Ciclocrós de Les Franqueses celebrada esta fin de semana en Cataluña.
A ciclista do XSM, que chegaba á cita como quinbta clasificada da xeral da Copa de España, aproveitou a ausencia das favoritas para impoñerse tras unha notable remontada. Trabazo alcanzou o trío que marchaba na cabeza a catro voltas do final e marchou en solitario para levantar os brazos na meta final con 21 segundos de vantaxe sobre Sara Bonillo e Nahia Arana, segunda e terceira respectivamente.
Tamén tivo acento pontevedrés a carreira masculina absoluta, con triunfo dun corredor do Supermercados Froiz como Gonzalo Inguanzo.
O cántabro superou nun bonito duelo o gran favorito e novo líder da xeral, Mario Junquera, ao que avantaxou en 10 segundos en meta. Terceiro foi o sub-23 Raúl Mira a 47 segundos e cuarto outro ciclista do Froiz, Miguel Rodríguez.
En Les Franqueses sumou ademais un novo triunfo esta tempada a marinense Lorena Patiño (XSM) na categoría júnior, por diante da súa compañeira de equipo Marta Estévez e de Irati Aranguren. Quinta finalizou ademais Aroa Otero (Froiz).