deportes

Os irmáns Chamosa, na preselección de España para o Mundial de Tokyo

Pontevedra
11 de xuño 2025
Diego Espiño

Antía e Daniel Chamosa son parte dos 15 atletas que cumpriron cos criterios establecidos polo seleccionador nacional e a dirección deportiva da RFEA

Antía Chamosa, no Campionato de España de Marcha en Ruta
Antía Chamosa, no Campionato de España de Marcha en Ruta / RFEA

É a gran cita do ano no atletismo e alí estarán dous irmáns pontevedreses.

Antía e Daniel Chamosa foron incluídos na preselección oficial da Selección Española de Marcha para o Campionato do Mundo de Tokyo.

A cita mundialista celebrarase aínda no mes de setembro, do 13 ao 21 do citado mes, pero a Real Federación Española de Atletismo (RFEA) empezou a desvelar os nomes dos atletas que cumpriron criterios para participar na maior competición da tempada.

No que respecta á marcha son 15 os atletas (6 homes e 9 mulleres) os que cumpriron os criterios establecidos polo seleccionador nacional, José Peiró, e a dirección deportiva da RFEA.

Antía Chamosa, flamante campioa de España esta tempada en 20 e 35 quilómetros e cuarta no Europeo por Equipos de Podebrady nos 20 quilómetros, é unha das catro atletas preseleccionadas precisamente na distancia olímpica, os 20 quilómetros.

Figura na lista xunto á medallista en París 2024, María Perez, e xunto a Laura García-Caro e Paula Juárez.

No que respecta a Dani Chamosa, gañou o dereito a debutar nun Mundial nos 35 quilómetros marcha como terceiro mellor marquista español.

Nesta proba aparecen tamén o recordman nacional Miguel Ángel López, ouro mundial en 2015, e Manuel Bermúdez.

Máis novidades