Gran estrea da armada pontevedresa no Campionato de Europa de Piragüismo Maratón que este xoves arrincou na localidade portuguesa de Ponte de Lima.
A punta de lanza desa gran posta en escena foi Jaime Duro (EP Ciudad de Pontevedra), ao lograr a medalla de ouro na proba curta sénior masculina de canoa.
O pontevedrés dominou de principio a fin para facerse co título europeo cun tempo de 15:10.58.
Segundo foi o polaco Mateusz Zuchora (15:27.18) e o seu compatriota Mateusz Borgiel foi terceiro (15:30.90).
En cuarta posición, a só 10 segundos do podio, entrou o grovense Tono Campos (Breogán), cun tempo de 15:40.02.
Destacada foi tamén a quinta praza conseguida por Jaser Silva (Breogán do Grove) no C-1 xuvenil, proba na que o galego Héctor Vázquez (Club Fluvial de Lugo) foi prata.
O Campionato de Europa de Maratón contiuará a súa actividade con diferentes categorías e probas até o vindeiro domingo 8 de xuño.