A SD Teucro segue avanzando no deseño do persoal coa que afrontar o seu regreso á máxima categoría do balonmán español, a liga Asobal. O club chegou a un acordo co porteiro canario Javi Santana para prolongar o seu contrato durante unha tempada máis.
Santana, que chegou o verán pasado procedente do BM Vila de Aranda, defenderá a portería pontevedresa xunto a Jorge García Lloria. Ambos formarán un dúo de garantías.
Javi Santana, que está na súa segunda etapa como xogador da SD Teucro, militou na liga Asobal durante 7 tempadas e móstrase moi feliz coa renovación.
"Estou moi contento de seguir na SD Teucro despois de conseguir o ascenso. Tiña claro que quería seguir en Pontevedra e espero axudar a conseguir a permanencia en Asobal", explicou.
Con esta renovación de Javi Santana xa son sete os xogadores azuis que teñen contrato en vigor para a próxima tempada.