Javier Gómez Noya destapa a súa estrela da fama no CEP Marcos da Portela

Este venres celebrouse no CEP Marcos da Portela unha xornada moi especial para os máis pequenos, que gozaron da visita de todo un pentacampión mundial como Javier Gómez Noya.

O triatleta visitou este centro educativo de Monte Porreiro para impartir unha charla sobre a súa gran experiencia como deportista de elite e transmitir os valores do deporte aos escolares, que participaron de forma interactiva e mesmo se vestiron de xornalistas para lanzar as súas preguntas.

A oportunidade merecíao, pois non todos os días tense a oportunidade de falar cun pentacampión mundial, catro veces campión de Europa e medalla de prata nos Xogos Olímpicos de Londres 2012.

Tras a charla produciuse o momento estrela da xornada, nunca mellor dito, pois o CEP Marcos da Portela homenaxeou a carreira deportiva de Gómez Noya coa súa particular estrela da fama, que foi destapada polo triatleta xunto ao director do colexio, Rafael Maquieira.

O propio Javier Gómez Noya recoñeceu que "emociona que veñas a un cole e sexas recibido desta maneira" e explicou que forma parte de "ese compromiso que eu teño e que moitos deportistas teñen de fomentar o deporte nos mozos e mozas de idades tan temperás".

En relación a iso, o pentacampeón mundial recoñeceu que "promover unha alimentación saudable, uns hábitos de descanso e actividade física eu creo que debería ser algo super importante, independentemente de que logo os seus camiños vaian polo deporte ou non".

E é que o deportista galego é un espello no que mirarse para moitos nenos e nenas que, quizais, tamén cheguen todo o máis alto do deporte no futuro: "Aquí hai bastantes deportistas, algúns con resultados importantes para a idade que teñen. Ver a deportistas como nós, que estivemos no máis alto, pode servir como referencia e motivación para que vexan que calquera persoa o pode conseguir".

"Con poucos medios ao principio cheguei a ser profesional e a gañarme a vida con isto", afirmou Gómez Noya.

Para pechar a xornada, os escolares participaron nun circuíto de actividades no pavillón do colexio baixo a supervisión e o consello de todo un referente como é o triatleta galego.

O director, Rafael Maquieira, explicou que neste circuíto "proban distintos tipos de habilidades, forza, resistencia, coordinación... todo nun ambiente moi lúdico".

Nuns cartóns, os escolares rexistraron os seus resultados de cada actividade para elabora un perfil individual e outro grupal, todo isto "co pano de fondo do que é o fomento da actividade física do deporte e os hábitos de vida saudables".