Jéssica Bouzas continúa con paso firme a súa andaina en Wimbledon.
Por terceiro ano consecutivo, a tenista de Vilagarcía meteuse na terceira rolda do Grand Slam londiniense tras imporse este mércores a ucraína Dayana Yastremska nun partido que se alargou até as dúas horas e seis minutos.
A arousá encarrilou o encontro levándose o primeiro set por 6-3 e mesmo chegou a ter moi preto a vitoria na segunda manga, onde dominaba por 4-2.
Nese momento apareceron os nervios e Yastremska, número 67 do mundo, reaccionou con dobre break para darlle a volta ao parcial.
Bouzas logrou refacerse, igualar de novo a contenda e enviar o partido ao tie break, no que a ucraína foi claramente superior (7-1).
Lonxe de acusar o golpe, a galega respondeu no terceiro e definitivo set recuperando a súa mellor versión para imporse por 6-2 e selar a súa clasificación para a seguinte rolda.
Unha das claves do partido foron os erros non forzados con 31 para Yastremska por só 13 da de Vilagarcía.
Desta forma, Bouzas asinou un gran triunfo ante unha rival á que xa derrotara neste mesmo torneo o ano pasado.
Na seguinte rolda medirase á gañadora do duelo entre a estadounidense Jessica Pegula, cuarta cabeza de serie, e a española Sara Sorribes.