Centos de deportistas gozaron un ano máis coa XX edición da Milla Urbana San Miguel en Marín.
A céntrica Avenida de Ourense acolleu de novo a cita deportiva, con máis de dúas horas de actividade grazas ás diferentes probas de categorías inferiores e tamén a carreira popular de 5.000 metros que se organizaba por primeira vez de forma paralela.
O prato forte da Milla Urbana San Miguel quedou para o final, coas probas elite nas que se impuxeron os grandes favoritos.
Joselyn Brea foi a vencedora absoluta na categoría feminina cun tempo de 4 minutos e 55 segundos, tres segundos de vantaxe sobre Leticia Fernández e catro sobre Ester Navarrete, segunda e terceira respectivamente.
En canto á proba masculina o local Víctor Riobó foi o máis rápido (4'26'') superando no sprint final a Gonzalo Basconcelo e Carlos Porto, que completaron o podio.
Consulta aquí os resultados completos da XX Milla Urbana San Miguel en todas as categorías.
Durante a xornada o Club Deportivo Pinarium visibilizou ademais o seu malestar pola suspensión da carreira Pinga Pinga de Santo Tomé de Piñeiro, que estaba prevista para o vindeiro sábado 7 de outubro.