O calendario ciclista está a ver estes días como se cancelan algunhas das carreiras previstas, como a Clásica de Pascua de Padrón na Copa España que se ía a celebrar o 16 de setembro.
A pesar diso, o Grupo Deportivo Supermercados Froiz non descansa tentando chegar na mellor forma posible ao tramo final do curso, se o Covid o permite.
Con esta intención tres dos ciclistas do conxunto pontevedrés, como son Guillermo García, Abel Franco e Adrián Barros, pasarán as dúas próximas semanas concentrados en Manzaneda.
Os tres aproveitarán estes días para adestrar en altura buscando afinar a súa posta a punto poñendo a súa mira nas últimas probas da Copa de España Elite e Sub-23, así como roldas por etapas como a Volta a Galicia.
Tras as últimas suspensións, a Copa de España non se retomará previsiblemente ata o 4 de outubro coa Clásica Torredonjimeno, manténdose aínda no calendario o Memorial Valenciaga (11 de outubro) e o Gran Premio Macario (18 de outubro).