A pontevedresa Melania Rodríguez fixo historia nos World Games de Chengdu, China, ao bater o récord mundial na modalidade de dobre mini tramp e colgarse a medalla de bronce.
A atleta do Club Ximnasia Pontevedra realizou unha gran final onde ofreceu unha espectacular pirueta barani carpa tripla que impresionou ao xurado, obtendo unha puntuación de 26.900, novo récord do mundo por unha décima.
O exercicio foi avaliado con 8.900 puntos de dificultade e 18.600 de execución, aos que se descontou unha penalización de 0,600, certificando así un resultado que a sitúa no máis alto do panorama internacional.
Con todo, o camiño ata o podio non foi sinxelo. Superou a rolda clasificatoria con 52.000 puntos e un fallo na semifinal apartouna da loita polo ouro e levouna a pelexar polo bronce.
Foi nese último salto cando Melania sacou o mellor de si e asinou un exercicio para a historia.
O podio completárono a portuguesa Diana Gago, que se proclamou campioa con 26.200 puntos, e a estadounidense Grace Harder, que obtivo a prata.
Co bronce de Melania Rodríguez, España suma xa dez metais nestes World Games.