A pontevedresa Melania Rodríguez colgou esta fin de semana a medalla de bronce na final feminina de dobre minitramp (DMT) do Campionato do Mundo de Ximnasia disputado en Bakú, Acerbaixán.
A deportista do club Ximnasia Pontevedra-Burgas Ourense, que pasara á proba definitiva coa primeira mellor nota absoluta (70.700), tívose que conformar finalmente cun moi valioso terceiro posto.
Melania subiu ao podio cunha nota de 69.600, por detrás da sueca Lina Sjoeberg, que se fixo co ouro con 70.900, e da estadounidense Shelby Nobuhara, segunda con 70.000.
Ademais deste resultado, a pontevedresa alcanzou a final de trampolín na que logrou a sétima posición cunha puntuación de 53.615, cravando practicamente o resultado das semifinais nas que foi novena logrando o último billete para a final. Este resultado, conseguido na modalidade olímpica da ximnasia trampolín, supón un reforzo ás súas aspiracións de estar nos XXOO de París 2024.