Espectacular! Non hai outro cualificativo para o que conseguiu a pontevedresa Melania Rodríguez este venres na primeira xornada da Copa do Mundo de Ximnasia Trampolín que se celebra na localidade italiana de Rimini.
A deportista do Ximnasia Pontevedra-Burgas Ourense bateu o récord do mundo de dobre minitramp ( DMT), especialidade na que é o vixente bronce mundial e na que suma tamén unha prata conseguida en 2018.
Melania, acompañada do seu adestrador Pablo Hinojar, conseguiu unha puntuación nunca antes vista grazas a unha pirueta barani agrupada tripla carpa de 8,5 puntos de dificultade, cunha execución que convenceu aos xuíces e que lle valeu o pase á final.
Nada máis aterrar a celebración do seu preparador e seleccionador nacional de DMT evidenciaba o importante do salto, tal e como se pode ver no vídeo compartido pola Real Federación Española de Gimnasia.
¡RÉCORD DEL MUNDO!
— RFEGimnasia (@RFEGimnasia) May 27, 2022
Espectacular Melania Rodríguez que consigue récord mundial tras realizar pirueta barani agrupada triple carpa de 8,5 de dificultad en la Copa del Mundo de Rimini #TeamESP #DMT pic.twitter.com/Hd0oSB3wfq
A Copa do Mundo de Rimini é a primeira gran competición da tempada da ximnasia trampolín, e que serve de aperitivo ao Campionato de Europa que dará comezo tamén en Rimini o próximo día 1 de xuño, unha cita na que a pontevedresa tamén competirá na modalidade olímpica de trampolín na que aspira á clasificación para os Xogos de París 2024.
Ademais, Melania ten previsto participar este ano, na proba de DMT, nos prestixiosos World Games que terán lugar en Estados Unidos.