O Centro Galego de Tecnificación Deportiva (CGTD) acolleu este mércores unha nova xornada do Circuíto de Atletismo en Pista.
A competición arrincou coas probas das categorías sub10 e sub12, nas que os máis pequenos enfrontáronse ao lanzamento de pelota ou ao 1.000 metros lisos.
En categorías superiores destacou a actuación de Carlota Vázquez, que logrou a clasificación para o Campionato de España tras asinar un tempo de 14.69 segundos nos 100 metros valas.
Tamén despuntou Hugo Cordal, que foi sétimo no 1.000 metros lisos, acusando o esforzo tras a súa recente participación no Campionato de España Individual Tríatlon E, celebrado na Nucía. A pesar do cansazo, mellorou as súas marcas persoais en xavelina (25,61 metros), 80 metros lisos (11.46 segundos), 2 quilómetros marcha (10:40) e nos 80 metros valas (15.26 segundos).
Durante a xornada tamén superaron os seus rexistros atletas como Karol Rivera nos 100 metros lisos, Sergio Lamas en lanzamento de disco de 1,5 quilos, Jovi Uyokpiye nos 110 metros valas e Lía Currás en salto de lonxitude, onde alcanzou os 4,94 metros.
O vento e a choiva, intermitentes e fortes, engadiron dificultade a unha competición que obrigou aos participantes a esixirse ao máximo.
O circuíto continuará o vindeiro mércores 17 de xuño coa celebración do Trofeo Celso Mariño.