O novo proxecto deportivo do Poio Pescamar suma unha nova peza co que é a súa terceira fichaxe.
Trátase de Miriam Esteban Sastre 'Miri', futbolista segoviana de só 17 anos que xoga no posto de ala-pivote e procede do CD Segosala de Segunda División.
Formada no Sporting Nava de la Asunción, Miri é ademais internacional con España en categoría Sub-19.
Co seu salto ao conxunto conserveiro poderá debutar agora en Primeira División, nun proxecto que volverá exporse obxectivos ambiciosos tras dúas presenzas consecutivas no play-off polo título de liga.
Miri é a décima peza confirmada no plantel vermello, xunto ás tamén fichadas Candela Soria e Èlia Gullí e ás renovadas Sandra Buzón, Elena, Elena Aragón, Ale de Paz, Irene, Laura Uña e Martita.