O club de atletismo Moraña en Ruta naceu no ano 2020 da man dos seus fundadores, Manolo Calvo e Celina Rodríguez, coa intención de impulsar o deporte da comarca e crear unha comunidade onde o compañeirismo e a superación persoal cobrasen maior relevancia que as marcas do cronómetro.
Seis anos despois, esta entidade de Moraña vive un crecemento sen igual grazas, en parte, a unha iniciativa que permite compartir espazos de adestramento con grandes figuras do atletismo autonómico.
E é que as dúas primeiras xornadas destes adestramentos compartidos deixaron un gran sabor de boca. David de la Fuente foi o primeiro convidado por parte do club morañés e Pablo Otero seguiulle na segunda sesión.
Ambos mostraron o seu lado máis humilde e amable para axudar e transmitir os seus coñecementos aos participantes nestas dinámicas de grupo. Sen dúbida, a súa predisposición foi un dos factores crave no gran éxito desta iniciativa.
Desde o club son conscientes da gran oportunidade e do momento de crecemento que están a vivir con 40 atletas federados na actualidade.
É por iso que van dar un paso adiante na súa organización interna co fin de poder compaxinar e canalizar todas estas actividades que tanto éxito teñen entre os seus deportistas.
A novo organigrama do Moraña en Ruta xa explora novas opcións que permitan modernizar á entidade e darlle un empuxón máis para chegar a un maior número de corredores e corredoras. O obxectivo a curto e medio prazo é claro: Seguir dinamizando o club e ofrecer todo o soporte estrutural necesario para facer realidade novas ideas que poidan xurdir.
Todo iso, está claro, sen perder de vista a esencia que acompaña á entidade desde o ano 2020. Unha esencia familiar, de compañeirismo e de superación persoal.