Só transcorreran 50 segundos de xogo na Lomba cando Juanto, nunha xogada persoal, poñía en vantaxe á Sociedad Deportiva Poferradina.
Foi un reflexo do que viría despois. O Arosa caeu goleado na casa ante o potencial do cadro berciano (1-5) na ida dos dezaseisavos de final da Copa Federación, dicindo adeus ás opcións de seguir avanzando na fase nacional da competición.
Os de Jorge Otero repuxéronse do gol inicial e tentaron estirarse, buscar a igualada e agradar ao seu público, pero aos 20 minutos de novo Juanto facía o 0-2.
A opción para os arlequinados chegou só dous minutos despois, pero Cabanyes errou un lanzamento de penalti e pouco despois os visitantes volvían anotar, co terceiro de Juanto e outro gol de Caiado.
Duro e excesivo castigo ao descanso para o Arosa que atopou premio na continuación cun gol de Aitor Díaz á saída dun corner.
A Ponferradina seguiu sendo superior e controlou o partido, con ocasións para ampliar a súa vantaxe ata que o 86 Héctor Figueroa poñía o definitivo 1-5.
Coa eliminatoria decidida os de Vilagarcía viaxarán en dúas semanas ao Toralín para un partido de volta no que o único obxectivo será gozar da experiencia.