Logo dunha pretempada con problemas, de efectivos nos adestramentos principalmente, o Arxil afronta esta semana o inicio da Liga Feminina 2, na que aspira a repetir o gran resultado da pasada campaña, cando xogou o play-off de ascenso á máxima categoría.
Con todo non será ese o obxectivo principal, se non "manter a praza na categoría e a partir de aí ir subindo peldaños", explica o coordinador do club, Lino Vázquez.
Para iso Mayte Méndez contará cun plantel continuista no que cambian fundamentalmente dous nomes, as das xogadores estranxeiras. Se o ano pasado o salto de calidade quedaba para Maimouna Diarrá e Fallon Lewis, esta vez a responsabilidade será para a portuguesa Rossie Duarte e a xamaicana Yanique Gordon.
Trala chegada de Gordon hai apenas unha semana, o equipo prepárase ao completo co obxectivo de arrancar a liga con bo pé.
O primeiro compromiso do Arxil será un derbi provincial contra o Cortegada de Vilagarcía fixado para o vindeiro sábado 3 de outubro (19:30 horas) no Centro Galego de Tecnificación Deportiva de Pontevedra.
En canto aos rivais de grupo, Lino Vázquez sitúa na terna de favoritos a "os dous vascos, o Aros de León, Cáceres e posiblemente Celta", sinalou o coordinador arxilista.