O Arxil necesita apoios para seguir crecendo na segunda categoría do baloncesto feminino nacional. Baixo o lema Obxectivo 10.000, o club pon en marcha a súa campaña de socios para a próxima tempada. O carné ten un prezo de 20 euros e dá acceso a todos os partidos de liga que o equipo verde dispute como local.
Este ano o equipo pontevedrés celebra os seus 35 anos de historia dedicados en corpo e alma á formación deportiva e persoal de xogadoras de baloncesto, por iso fan un chamamento ás xogadoras e pais que formaron parte desta familia para "arrimar o ombreiro" e dar o empuxón que o Arxil necesita para subir un novo chanzo.
O abono servirá para presenciar os 13 partidos de liga que o equipo xogará este ano como local. Cun prezo de 20 euros, "cada partido sae a 1,50 euros", explican desde o club. "Moi inferior ao prezo da entrada individual", engaden. Ademais, os socios poderán acceder aos partidos amigables.
"Esta tempada é moi especial para o club e espera conseguir o obxectivo, que é chegar aos 10.000 euros" esenciais para sufragar os gastos de desprazamentos durante toda a tempada, sinala o presidente da entidade, Liño Vázquez.
Na páxina web oficial do Arxil está toda a información e impresos necesarios para facerse socio.