O ascenso pasa polo Estadio Municipal de Pasarón

Pontevedra
04 de abril 2024
Actualizado: 30 de setembro

O Pontevedra é o único dos tres aspirantes á primeira praza que afrontará tres do últimos cinco partidos de liga na casa, un deles fronte a un rival directo como o Ourense CF. Se os granates suman eses nove puntos, obrigarían os seus opoñentes a rozar o pleno para arrebatarlles o liderado

Partido de liga entre Pontevedra e Compostela en Pasarón
Partido de liga entre Pontevedra e Compostela en Pasarón / Cristina Saiz

Cinco emocionantes xornadas para o final da liga quedan por diante na Segunda RFEF para un Pontevedra Club de Fútbol que xa sabe por onde pasará a clave para lograr o ascenso, non deixar escapar nin un só punto do Estadio Municipal de Pasarón.

Os granates contan cunha baza ao seu favor con respecto aos seus dous rivais polo primeiro posto, Ourense CF e Zamora, e é que son o único dos tres aspirantes ao salto directo de categoría que xogarán tres do seu últimos cinco encontros na casa.

Líderes actualmente con 60 puntos, os mesmos que Ourense e con tres máis que o Zamora (ao que ten gañado o diferencial), de sumar os nove puntos de Pasarón fronte a Covadonga, Ourense CF e Racing Villalbés, o Pontevedra obrigaría os seus opoñentes practicamente a rozar o pleno nas cinco xornadas para arrebatarlles o primeiro posto, un dato que compartía a principios de semana a conta @tintobarrantes_.

Se os de Yago Iglesias gañan eses duelo irian aos 69 puntos, catro máis dos que necesitou para ascender hai dúas tempadas, tendo en cuenta ademais que deixarían a cero una desas xornadas o Ourense e gañaríanlle o 'average'. Por iso o cadro da Cidade das Burgas só podería superar os granates neste suposto gañando tres dos seus encontros e empatando o cuarto, nun calendario no que ademais de visitar Pasarón atoparase a Guijuelo (fóra), Coruxo (casa), Oviedo Vetusta (casa) e Real Avilés (fóra).

Pola súa banda o Zamora só podería superar os 69 puntos gañando catro dos seus cinco partidos e rabuñando un empate no quinto, tendo como rivais a Rayo Cantabria (fóra), Valladolid Promesas (casa), Marino de Luanco (fóra), Langreo (fóra) e Arandina (casa).

No calendario do Pontevedra, ademais dos seus tres encontros como local, aparecen dous derbis galegos a domicilio fronte a SD Compostela e RC Deportivo Fabril.