O crecemento do fútbol feminino e a maior presenza da muller no mundo do fútbol é un movemento imparable, e así o demostraron este martes varias mulleres destacadas do deporte local nunha charla organizada polo Salgueiriños CF na Casa das Campás.
O club de base pontevedrés é unha das dúas únicas entidades da Boa Vila que esta tempada conta con equipos de fútbol integramente femininos, xunto á SCD Salcedo.
Por ese motivo, entre outros, quixo profundar e debater sobre o papel da muller no fútbol e fútbol sala desde diferentes visións.
Moderada pola xornalista Lara Sáez, na charla participaron a vicepresidenta do propio Salgueiriños, Lina Garrido; a presidenta do Pontevedra Club de Fútbol, Lupe Murillo; as colexiadas Iris Romero e Iria Rosendo; a adestradora Cris Oreiro (Viaxes Interrías); a capitá da Selección Española de Fútbol Praia, Andrea Mirón; e a capitá do Poio Pescamar, Irene García, ademais da concelleira de Deportes, Anabel Gulías.