Repetir a xesta de 2021, na que se proclamou Campión de España Xuvenil vencendo ao todopoderoso Barcelona na gran final, é case unha quimera para o Club Cisne Balonmán, pero o equipo pontevedrés aspira de novo a meterse entre as oito mellores canteiras do país accedendo á fase final da competición.
Para iso deberá impoñerse no Sector Nacional que organizará como local a próxima fin de semana, desde o venres 22 ata o domingo 24 de abril, e que foi presentado oficialmente este luns.
"Favoritos? Xogamos na casa e temos un gran equipo", defendeu o presidente cisneísta, Santiago Picallo, dando valor ao que "está a significar o Cisne a nivel de base" nos últimos anos, con presenza habitual nas fases finais e medallas nacionais.
"Entrar entre os oito mellores de España sería un éxito enorme", asegurou á súa vez o edil de Deportes, Tino Fernández.
En todo caso "vai ser un grupo moi complicado", avanza Picallo sobre uns rivais que serán o Abanca Ademar de León, o Ereintza Aguaplast e o Finetworx BM Gijón.
O sector nacional, que se celebrará no Pavillón Municipal dos Deportes de Pontevedra, contará cos seguintes partidos:
-
Venres 22 de abril:
- Ademar León - Gijón (18.00 horas)
- Cisne - Ereintza (20.00 horas)
-
Sábado 23 de abril
- Ademar León - Ereintza (10.30 horas)
- Cisne - Gijón (12.30 horas)
-
Domingo 24 de abril
- Ereintza - Gijón (10.00 horas)
- Cisne - Ademar León (12.00 horas)