Coma se tratásese dunha reposición do "estraño caso do doutor Jekyll e o señor Hyde", así é este Cisne capaz do mellor na súa pista do CGTD, pero que se transforma negativamente lonxe dela para ofrecer unhas actuacións moi distantes do seu poderío ofensivo nos desprazamentos. Os pontevedreses volveron a deixar escapar unha boa oportunidade de puntuar a domicilio na súa visita ao Amenabar Zarautz, tras un partido no que os de Jabato foron sempre a remolque, aínda que a punto estiveron de endereitar na recta final.
Porque non se pode cualificar de normal que o equipo terceiro máximo realizador da categoría, só superado por Barcelona e Teucro, non logre pasar dos dez goles en todo o primeiro tempo, o que, a pesar de mellorar prestacións na continuación, obrigoulle a unha remontada que non puido completar.
Os brancos só se viron con mínima vantaxe ao comezo do choque (1-2). Logo foi Amenabar quen levou o temón do partido, cun Xabat Olaizola (8 goles) imparable para os pontevedreses.
O equipo vasco, máis necesitado dos puntos para aliviar a súa delicada situación na táboa, saíu con moita intensidade defensiva, conseguindo frear a David Chapela, que só puido anotar un gol nos primeiros 30 minutos, e mediado o primeiro tempo lograba por primeira vez a que sería a súa máxima diferenza (7-3). Os visitantes reaccionaban pero sempre a tiróns, facendo unha especie de "goma" permanente, para chegar ao descanso dous goles por baixo (12-10).
Lonxe de mellorar a cousa, os comezos do segundo tempo foron de novo para o conxunto local, que volvía irse de catro, mentres o Cisne seguía nesa liña de altibaixos, que só lle servían para poñerse a un gol.
Amenabar pareceu resolver o partido cando a falta de doce minutos mandaba (22-18), pero aí precisamente o Cisne entoouse e puido levar o partido. Os de Jabato fixeron un parcial de 2-6 para empatar a 24, cun gol de Xosé Canedo, e menos de dous minutos por xogar, pero non foi suficiente. Xabat Olaizola facía o 25-24 e Miguel Simón resultaba excluído na mesma xogada. Quedaba 1' 25". O Cisne non atopou a forma de lograr o empate e Balenciaga sentenciaba na última xogada do partido o definitivo 26-24.
Consulta aquí o acta do partido.