Case dous anos despois da súa retirada, Pablo Picallo recibirá unha sentida homenaxe do equipo da súa vida, o Club Cisne Balonmán.
A entidade pontevedresa anunciou que retirará a camiseta do que foi o seu xogador durante 25 anos, os trece últimos no primeiro plantel.
Picallo foi partícipe durante esa época de tres ascensos históricos do Cisne, en 2015 cando o club subiu por primeira vez a División de Honra Prata e tamén os ascensos á Liga Asobal logrados nas tempadas 2019/20 e 2021/22.
A camiseta de Pablo Picallo será oficialmente retirada nun acto que se celebrará tras o encontro do próximo sábado día 13 (18.30 horas) que enfrontará ao Cisne e ao Eivissa.
Tras o encontro procederase primeiro á presentación dos equipos de base da entidade (20.00 horas) e posteriormente homenaxearase ao ex-xogador pontevedrés (20.20 horas).