O Complexo Deportivo Rías do Sur de Pontemuiños foi escenario a pasada fin de semana da final da Liga Galega Absoluta de Clubs, con gran resultado para o Natación Galaico.
A entidade pontevedresa recuperou na casa o título autonómico, que se resistía nas últimas tempadas, tras impoñerse na última xornada.
Fíxoo ademais sobrepoñéndose á ausencia da súa mellor nadadora, a olímpica Bea Gómez Cortés, concentrada co equipo nacional en Tenerife para preparar o próximo Campionato do Mundo.
O Galaico finalizou en primeiro lugar con 701 puntos, seguido de Pabellón Ourense (620) e Cidade de Santiago (544).
A fase final reuniu os seis mellores clubs de Galicia, coa presenza tamén de Club del Mar San Amaro (510), Natación Ferrol (479) e Natación Coruña (419), descendendo estes dous últimos á Primeira División.
Por parte do club pontevedrés participaron un total de 26 nadadores nas diferentes probas.