O Tenis de Mesa Monte Porreiro foi obxecto este venres dunha recepción oficial no Concello de Pontevedra polos seus logros no recente Campionato de España celebrado en Cartaxena.
Nesa cita o seu equipo feminino sumou ata seis medallas, destacando a prata sub-23 e o bronce infantil por equipos. Pero a temportada foi especial tamén na entidade deportiva ao ser a do seu debut en competición europea co seu equipo absoluto masculino.
"Vai ser a primeira dunha recua de recepcións que temos pendentes", sinalou na súa intervención o alcalde de Pontevedra, Miguel Anxo Fernández Lores, acompañado do edil de Deportes, Tino Fernández.
"O clube está crecendo. Estades non bo camiño", defendeu o rexedor aludindo ás posibilidades que ofrecerá a nova instalación proxectada no barrio de Monte Porreiro para a práctica específica deste deporte e na que se van investir máis de dous millóns de euros.
Pola súa banda o director técnico da entidade deportiva, Nando Álvarez, agradeceu a recepción afirmando que "é unha delicia estar aquí e que che recoñezan na túa propia casa".