Aos poucos o Teucro vai esfollando a margarida e dando a coñecer ás súas novas incorporacións, coas que espera pelexar para volver á máxima categoría do balonmán nacional.
Os azuis confirmaron este xoves a súa terceira fichaxe. Trátase do lateral dereito Saúl Campo, xogador de só 22 anos pero con experiencia na Liga Asobal, na que competiu a pasada campaña co Go Fit Sinfín cántabro tras ascender con eles en 2015.
Zamorano de nacemento, Saúl formouse nas categorías inferiores do Teka Cantabria antes de asinar, con 14 anos, polo BM Granollers, club no que permaneceu ata 2013.
"Terá que adestrar duro e mellorar en moitos aspectos pero creo que ten grandes calidades. Ademais ao ser zurdo achegaranos cousas que non tiñamos ata agora na nosa primeira liña", sinalou o seu novo adestrador, Quique Domínguez.