A poucos días do seu equipo sénior masculino xóguese na cancha o ascenso á Segunda División de fútbol sala, o Leis Pontevedra aparcou por unhas horas a súa atención da parte deportiva para celebrar a súa Asemblea Xeral de Socios.
Fíxoo, debido á situación actual provocada polo Covid-19, de maneira telemática cunha transmisión que foi gravada e estará agora ao dispor dos socios que a soliciten.
Segundo informou a entidade pontevedresa, na asemblea expúxose a memoria deportiva e económica das últimas tempadas así como os obxectivos actuais.
Ademais quíxose resaltar o traballo nas categorías inferiores nunha tempada na que alcanzaron a cifra de 300 futbolistas federados entre os seus diferentes equipos.
Por outra banda os xestores da entidade defenderon que conseguiron amortizar nun 50% a débeda histórica do club esperando que co ingreso das subvencións aínda pendentes "se consiga a tan ansiada estabilidade económica pola que se vén traballando nas últimas tempadas", sinalaron desde o Leis.
O encontro telemático serviu tamén para presentar aos socios o calendario de accións previsto para os próximos días coincidindo coa celebración da fase de ascenso.