En plena Semana Santa o Leis Pontevedra desprazouse a Asturias para xogar o partido aprazado no seu momento ante o Boal, no que conseguiu rescatar un punto nos minutos finais.
Os pontevedreses non se atoparon cómodos na pista de cemento e o estreito pavillón asturiano.
A pesar diso a posesión era inicialmente dos de Manu Cossío. Os locais defendíanse con acerto ata que un erro do Leis, o único e a primeira metade, aproveitábao Adri para dar vantaxe ao Boal no minuto 14.
Na segunda metade a tónica mantívose, cos locais encerrados e o Leis dominando. O premio a esa ambición chegou no minuto 30 co empate, obra de Dani. Con todo os locais volvían adiantarse no 32 nun libre indirecto.
Faltando cinco minutos Manu Cossío apostou polo porteiro-xogador, que se traduciu no 2-2 obra de Pablo no 37. Os pontevedreses mantiveron o xogo de cinco ata o final pero sen premio.
Con este empate o Leis queda na quinta praza da Segunda División B con 39 puntos.