O peche de inscricións do XXVIII Medio Maratón de Pontevedra confirmou un ano máis a boa saúde da que goza a proba.
O popular evento deportivo, que se celebrará o vindeiro domingo 15 de outubro a partir das 10.30 horas, contará este ano con 1.336 atletas.
É a cifra de anotados ao peche do prazo, aínda que pode incrementarse lixeiramente coa carreira de menores que pecha a súa inscrición o vindeiro venres día 13.
Do total de anotados, 816 deportistas participarán na distancia de medio maratón (21,1 quilómetros), no que o atleta internacional Reyes Estévez defenderá a súa coroa de 2022 e no que tamén se inscribiu o segundo clasificado do pasado ano, Anxo Castro. Tamén estará en categoría feminina a subcampioa de 2022 Ángela Rodríguez.
Pola súa banda a carreira curta de 10 quilómetros contará con 399 atletas, e na de menores anotáronse 121 corredores.