Ata Portugal desprazouse a fin de semana o Club Natación Galaico para participar no Meeting Internacional Póvoa de Varzim.
Foi a oportunidade para o club pontevedrés de comprobar a posta a punto dos seus deportistas para os grandes obxectivos da tempada en piscina de 50 metros, coas próximas competicións que asoman xa no calendario.
Na localidade portuguesa o Galaico presentou un equipo moi novo, composto por nadadores en idade infantil e júnior, e a pesar de tratarse dun trofeo de categoría absoluta, tivo presenza en varias finais e na pelexa de medallas.
Entre os resultados destacou o cuarto posto de Paula Fariña nos 400 estilos e os postos de finalistas de Nayara Fernández na 50 braza, de Nadia de la Fuente en 200 bolboreta e de Pablo Martín en 400 libre.
O Galaico completou a fin de semana co Campionato Galego Alevín de Inverno celebrado nas instalacións de Rías do Sur en Pontevedra, finalizando a só 42 puntos da vitoria por equipos.